Plovdiv

Plovdiv
Пловдив

Lidnanznam	Flag
Valdkund	Bolgarii
Eläjiden lugu (2024)	371,536 ristitud
Pind	101,98 km²
Pämez'	Kostadin Dimitrov (kül'mku 2023—, Костадин Димитров)
Telefonkod	+359−32
Aigvö	tal'vel UTC+2, kezal UTC+3

Plovdiv (bolg.: Пловдив [ˈpɫɔvdif]) om Bolgarijan kahtenz' lidn da kund eläjiden lugun mödhe. Se om valdkundan tegimišton znamasine keskuz da transportsol'm, Plovdivan agjan administrativine keskuz.

Ezmäižed eländpunktad oliba lidnan territorijal neolitas, 6. voz'tuhal EME. Vl 342 edel m.e. Filipp II Makedonijalaine oti frakijalaižiden lidnad vägel da udesnimiti sidä Filippopol' (grek.: Φιλιππόπολις Filippopolis) ičeze oiktastuseks, Pulpudeva frakijan virkandas. Mainitase 1. voz'sadan EME kirjutadud purtkiš, sil-žo aigal nimitihe lidnad Odris mugažo (nimi vasttase amuižil bronzrahuzil). Rimalaižen imperijan aigan (vspäi 45) lidn oli Frakii-provincijan keskuseks. Amuine avol'jaine teatr om kaičenus tähäsai, frakijan lidnusen seiniden ruinad oma vanhan lidnan röunaks.

Mainitase nügüdläiženke nimitusenke 11. voz'sadaspäi. Lidn oli bolgarižen udessündutamižen keskuseks Ottomanan imperijan tobmuden aigan, konz sen oficialine nimi oli Filibe. Manrehkaidused paniba Plovdivad mantazole vll 1818 i 1928. Ezmäine raudte läbiti lidnad vl 1874, sid' ühtenzoiti Sofijanke i Stambulanke.

Plovdiv šingotase sömtegimištol, mujumetalloiden metallurgijal, himižil edheotandoil, mašinansauvomižel, strategižel aviakohenduztegimel, tekstil'tegimištol (bumagkanghad, šuuk, omblend). Lidn om maižanduzrajonan keskuseks.

Lidn sijadase valdkundan keskuzpalan suvipäivlaskmas, Üläfrakijan alangos, 164 m ü.m.t. keskmäižel korktusel. Maric-jogi (bolg.: Марица) jagab lidnad kaks'haze. Matkad Sofii-pälidnhasai om 150 km lodeheze-päivlaskmha.

Klimat om subtropine kontinentan valatoitusenke. Keza om päivoikaz lujas, tal'vaig om pil'vekaz. Voden keskmäine lämuz om +14,0 C°, kezakun-sügüz'kun +21,6..+25,6 C°, tal'vkun-uhokun +2,2..+4,6 C°. Ekstremumad oma −31,5 C° (viluku) i +45,0 C° (heinku). Kezaaigan minimum om +5,6 C° (eloku), tal'vaigan maksimum om +24,0 C° (uhoku). Ei voi panda halad kezakus-sügüz'kus (sügüz'kun minimum om +0,7 C°). Il'man lämuz voib ülitada +22 C° miččel taht kul. Paneb sadegid 555 mm vodes, läz tazomäras kuidme, enamba semendkus-heinkus (56..62 mm kus) i tal'vkus (60 mm), vähemba kül'mkus (24 mm). Paneb lunt 18 päiväd tal'ves. Kun keskmäine relätivine nepsuz vajehtase 46..53 % röunoiš sulakus-sügüz'kus, 67..76 % kül'mkus-uhokus.

Plovdiv jagase kudeks administrativižeks rajonaks, ned alajagasoiš 34 nimitadud da nomeruidud lidnanlaptaks.

Lidnankundan nevondkund (bolg.: Общински съвет) kogoneb 51 nevonikaspäi. Valitas sen ühtnijoid i lidnan pämest nelläks vodeks. Edeližed lidnan pämehed (üks'lugu bolg.: кмет на град Пловдив) oma Zdravko Dimitrov (kül'mku 2019 — kül'mku 2023, vll 2011−2019 radoi Plovdivan agjan pämehen), Ivan Totev (reduku 2011 — kül'mku 2019).

Kaikiš suremb lidnan ristitišt om nügüd', se vajehtase 338..345 tuhad eläjid röunoiš vspäi 1985. Vl 2015 lidnankundan eläjiden lugu oli 368 983 ristitud^[1], ezilidnoidenke — 675 tuhad ristituid. Radinpäivän aigan lidnan ristitišt om 450 tuhad.

Avtobusad (30 maršrutad), maršruttaksid (kaks' jonod) i taksid oma kundaližeks transportaks lidnas. Edel 2012. vot trolleibussistem radoi. Om 60 km veloteid. Lidn om znamasižeks transportsol'meks, äi manteid i raudteid ühtenzoittas valdkundan erazvuiččidenke lidnoidenke. Suvibolgarijan raudteiden ohjanduzkund sijadase lidnas.

Rahvahidenkeskeine civiline Plovdiv-lendimport^[2] (bolg.: Международно летище Пловдив, PDV / LBPD, 184 tuh. passažiroid vl 2023) sijadase kudes kilometras suvipäivnouzmha lidnaspäi Krumovo-žilos. Tehtas reisid Londonha, sezonreisid Suren Britanijan toižihe järedoihe lidnoihe, om sezonižid čarterreisid Turkanman i Egiptan lebutahoiže. Krumovo-sodabaz radab ani päivlaskmha lendimportaspäi.

1. ↑ Bolgarijan eländpunktoiden ristitišt vn 2015 15. päiväl keväz'kud. — Bolgarijan Rahvahanikoiden registracijan da administrativižen holitusen radnikoičend (grao.bg). (bolg.)
2. ↑ Rahvahidenkeskeižen Plovdiv-lendimportan sait (plovdivairport.com). (bolg.) (angl.)

• Kundan ohjastusen oficialine sait (plovdiv.bg). (bolg.) (angl.)

Plovdiv Vikiaitas