Nas umana
La nas umana es la organo prima de la sistem de respira. Lo es ance la organo xef en la sistem olal. La forma de la nas es determinada par la osos nasal e la cartilajes nasal, incluinte la septo nasal, cual separa la narinas e divide la caveta nasal a du.
La nas ave un funsiona importante en respira. La mucosa nasal cual fore la caveta nasal e la sinuses paranasal prepara la aira enspirada par caldi e moia lo. Concas nasal, osos con forma de conca en la mures de la cavetas, jua un rol major en esta prosede. Filtri de la aira par pelos nasal en la narinas preveni ce particulas grande entra a la pulmones. Stornui es un reflexe per espulsa particulas nondesirada de la nas cual irita la fore mucosa. Stornui pote transmete infetas, car airosoles es creada en cual la gotas pote conteni patojenes.
Un otra funsiona major de la nas es olal, la sensa de ole. La area de epitelio olal, en la caveta nasal alta, conteni selulas olal spesialida encargada con esta funsiona.
La nas partisipa ance la parla. Vocales nasal e consonantes nasal es produida en la prosede de nasali. La cavetas vacua de la sinuses paranasal ata como cambras de sona cual cambia e amplifia parla e otra sonas vosal.
On ave alga prosedes de sirurjia plastica cual on pote fa a la nas, conoseda como rinoplastias, disponable per coreti defetos strutural variosa o per cambia la forma de la nas. Defetos pote es conjenital, o resulta de desordinas nasal o de trauma. Esta prosedes es un tipo de sirurjia reconstruinte. Prosedes elejable per cambia la forma de un nas es un tipo de sirurjia cosmetica.