Uren'

Uren'
Урень

Lidnanznam
Valdkund	Venäma
Eläjiden lugu (2021)	12,450 ristitud
Pind	20 km²
Telefonkod	+7−83 154-xx-xxx
Avtokod	52, 152
Aigvö	UTC+3 (MSK+0)

Uren' (ven.: Уре́нь) om Venäman lidn da avtotesol'm Alalidnan agjan pohjoižpäivnouzmas. Se om Urenin ümbrikon (edel vn 2020 semendkud — rajonan) administrativižeks keskuseks da palaks.

Eländpunkt mainitase ezmäižen kerdan vl 1719 kuti vanhuskolaižiden Tröhsvätskoje-žilo (ven.: село Трёхсвятское). Uren' -raudtestancii radab 1920-nziden voziden keskespäi. Oli radnikžiloks vspäi 1959. Sai lidnan statusad vl 1973.

Uren' šingotase biohimižel tegimel, sömtegimištol (voitegim, leibtegim), mugažo mebel'- i omblendfabrikad ratas lidnas.

Lidn sijadase ümbrikon keskuzpalas, Ustanjogen oiktal korktal randpolel (nitmar.: Ышта 253 km pitte, Volgan hurapol'ne bassein), 110 m ü.m.t. keskmäižel korktusel.

«Alauz'lidn — Kirov»-raudtekeskust jagab lidnad poleti, «Alauz'lidn — Kirov»-mante ümbärdab lidnad lodehespäi. «Uren' — Kotlas»-avtote augotase lidnas. Matkad Alauz'lidnhasai om 165 km suvipäivlaskmha orhal, 210 km avtotedme vai raudtedme. Lähembaižed lidnad oma Vetlug 43 km pohjoižhe orhal vai 46 km avtotedme i Šahunj 54 km päivnouzmha-pohjoižpäivnouzmha orhal, 57 km avtotedme vai raudtedme.

Klimat om ven kontinentaline. Heinkun keskmäine lämuz om +18,0 C°, vilukun −12,9 C°.

Artamonovo-külä (135 rist. vl 2010) i Sosnovk-žilo kaikenaigaižeta ristitištota mülüihe lidnankundha Urenin ližaks. Lidnankundan pind oli 100,15 km².

Lidnankundan tobmuden pämez' oli sen Duman ezimez'. Lidnan Dum om likvidiruidud vn 2021 vilukus. Aleksandr Blagovarov oli likvidacižen laudkundan ohjandajan vn 2020 sügüz'kuspäi, hän-žo radoi Duman jäl'gmäižen ezimehen (sügüz'ku 2015 — sügüz'ku 2020). Lidnan Administracii om likvidiruidud vn 2020 kül'mkus. Jäl'gmäine Administracijan pämez' oli Vladimir Gorišnii vn 2020 kül'mkuhusai.

Vn 2010 Venäman rahvahanlugemižen mödhe lidnan eläjiden lugu oli 12 304 ristitud, lidnankundan — 12 439 ristitud, rajonan kaks' videndest. Vn 2021 rahvahanlugemižen mödhe lidnan ristitišt oli 12 450 eläjad. Kaik 12 385 ristitud elihe lidnas i 12 502 ristitud kaikes lidnankundas vl 2017. Kaikiš suremb lidnan ristitišt oli enamba 13 tuhad eläjid vll 1979−2001 (13 560 rist. vl 1989).

Ortodoksižen hristanuskondan kaks' pühäpertid^[1] oma väges lidnas: Koumen Pühämehen jumalanpert' (om saudud vl 1829) i vanhuskolaižiden Spasan Armahtajan puine jumalanpert' (letihe vll 1991−1995).

Lapsiden opendusen aluzkundad oma severz'-se päivkodid, kaks' keskškolad (nomer 1, 2), korrekcine škol-internat, čomamahtoine škol, lapsiden da norišton sportškol. Urenin industrialiž-energetine tehnikum^[2] om lidnan professionaližen opendusen aluzkundaks.

• 
  Urenin rajonan käskuzkund (2007)
• 
  Koumen pühämehen jumalanpert', vn 2007 nägu
• 
  «Mila»-zell'lauk i Käzitöiden pert' rindati (2007)
• 
  Urenin rajonan kul'turkeskuz i Suren sodan memorial (2007)
• 
  Uren' -päraudtestancijan sauvuz vl 2007

1. ↑ Urenin pühäpertid sobory.ru-saital. (ven.)
2. ↑ Urenin industrialiž-energetižen tehnikuman sait (gbpou-uiet.ru). (ven.)

• Lidnan da sen ümbrikon tobmuden sait (uren.nobl.ru). (ven.)

Uren' Vikiaitas